27/11/2020 1:29 pm ពោធិ៍សាត់
ពោធិ៍សាត់៖ យន្តហោះពណ៌ក្រហមមួយបានដាក់បញ្ឈរ នៅចំកណ្ដាលរីស៊ត ក្នុងស្រុកតាលោសែនជ័យ ខេត្តពោធិ៍សាត់ កំពុងទាក់ទាញទេសចរយ៉ាងច្រើនទៅកាន់ខេត្តមួយនេះ។ បើតាមលោក យិន ចិន អ្នកច្នៃយន្តហោះសិប្បនិមិត្មនេះឡើង បានរៀបរាប់ប្រាប់សារព័ត៌មានThmeyThmey25ថា៖«ខ្លួនបានបោះទុនប្រមាណ ១ម៉ឺន២ពាន់ដុល្លារ ក្នុងការបង្កើតយន្តហោះសិប្បនិមិត្មនេះឡើង ដោយសារការស្រឡាញ់យន្តហោះតាំងពីតូច និងចង់បង្កើតយន្តហោះឡើង ព្រមទាំងចង់ឲ្យស្រុកតាលោសែនជ័យមានកន្លែងដើរកម្សាន្តមួយផងដែរ»។ បន្ទាប់ពីបង្កើតយន្តហោះសិប្បនិមិត្មចេញជារូបរាង រីស៊តលោក យិន ចិន ទទួលបានភ្ញៀវយ៉ាងច្រើន ដោយកាលពីថ្ងៃឈប់សម្រាកពិធីបុណ្យភ្ជុំបិណ្ឌមានទេសចរប្រមាណ ២៣០០នាក់ ដែលអាចឲ្យលោកទទួលបានចំណូលប្រហែលជិត២០០០ដុល្លារ។ លោកបានបន្ថែមថា ចំពោះថ្ងៃធម្មតាលោកអាចរកចំណូលពីការចូលកម្សាន្តចន្លោះពី៥០ដុល្លារ ទៅ១០០ដុល្លារ។
